బీజేపీ నాయకత్వంలో సేవా కార్యక్రమాలు..

 నమస్తే భారత్,షాద్ నగర్ మార్చ్21 : షాద్‌నగర్ పట్టణంలోని పరిగి రోడ్‌లో జిల్లా కౌన్సిల్ మెంబర్ శ్రీనివాస్ చారి ఆధ్వర్యంలో వేసవి తాపాన్ని దృష్టిలో ఉంచుకుని ప్రజలకు శీతలపానీయాలు అందించేందుకు ఏర్పాటు చేసిన చలివేంద్రాన్ని బీజేపీ రాష్ట్ర కార్యవర్గ సభ్యులు అందే బాబయ్య, నెల్లి శ్రీ వర్ధన్ రెడ్డి  విశ్వహిందూ పరిషత్ రాష్ట్ర ప్రధాన కార్యదర్శి బండారి రమేష్ గారు కలిసి ప్రారంభించారు. ఈ సందర్భంగా ముఖ్య అతిథులుగా హాజరైన బీజేపీ రాష్ట్ర కార్యవర్గ సభ్యులు మాట్లాడుతూ, “వేసవి కాలంలో ప్రజలకు మంచినీటి సదుపాయాన్ని అందించడమే కాదు, సేవా కార్యక్రమాలను విస్తృతంగా నిర్వహించడం ఎంతో అవసరం. బీజేపీ ప్రజాసేవే లక్ష్యంగా ముందుకు సాగుతుంది. ఇటువంటి కార్యక్రమాలకు మద్దతుగా నిలుస్తాం. ప్రతి ఒక్కరు సామాజిక బాధ్యతగా ఇలాంటి సేవా కార్యక్రమాలకు ముందుకు రావాలి” అని సూచించారు.జిల్లా కౌన్సిల్ మెంబర్ శ్రీనివాస్ చారి మాట్లాడుతూ, “ప్రతి ఏడాది వేసవి కాలంలో ప్రజలకు ఉపశమనం కలిగించేలా చలివేంద్రాలను ఏర్పాటు చేస్తున్నాం. రహదారిపై ప్రయాణించే వారు, స్థానిక ప్రజలు శుద్ధమైన తాగునీరు పొందేలా ఈ కార్యక్రమాన్ని కొనసాగిస్తున్నాం. భాజపా నాయకుల సహకారంతో మరిన్ని సేవా కార్యక్రమాలు చేపట్టనున్నాం” అని తెలిపారు.ఈ కార్యక్రమంలో బీజేపీ నాయకులు, కార్యకర్తలు, భాజపా యువ మోర్చా సభ్యులు, స్థానిక ప్రజాప్రతినిధులు, పెద్ద సంఖ్యలో ప్రజలు పాల్గొన్నారు. చలివేంద్రాన్ని ప్రారంభించిన అనంతరం నాయకులు ప్రజలకు స్వచ్ఛమైన నీటిని అందజేశారు.ఈ సేవా కార్యక్రమాన్ని ప్రజలు హర్షించి, శ్రీనివాస్ చారిని అభినందించారు. బీజేపీ నాయకత్వం ప్రజలకు సేవ చేయడమే లక్ష్యంగా ముందుకు సాగుతుందని, భవిష్యత్తులో మరిన్ని ప్రజా సంక్షేమ కార్యక్రమాలు చేపడతామని నాయకులు తెలిపారు.