యాంకర్ ప్రదీప్ మాచిరాజు అంటే బుల్లితెర ఆడియన్స్‌కు స్పెషల్ క్రేజ్ ఉంది. అలాంటి ఈ యాంకర్ 30 రోజుల్లో ప్రేమించడం ఎలా అనే సినిమాతో హీరోగా మారి మంచి మార్కులు కొట్టేశాడు. ఆ సినిమా సక్సెస్‌ అయిన వెంటనే వరుసపెట్టి సినిమాలు చేయకుండా.. చాలా జాగ్రత్తగా కెరీర్‌ను ప్లాన్ చేసుకుంటున్నాడు. చాలా రోజుల గ్యాప్ తీసుకుని ‘అక్కడ అమ్మాయి ఇక్కడ అబ్బాయి’ సినిమా చేశాడు. ఢీ షోలో తనతో పాటు కామెడీ చేసిన దీపిక పిల్లి హీరోయిన్‌గా నటించడంతో ఈ సినిమాపై మంచి హైప్ వచ్చింది.ఇప్పటికే రిలీజైన టీజర్, ట్రైలర్, పాటలు ఇప్పటికే అద్భుతమైన రెస్పాన్స్ అందుకున్నాయి. ఈ సినిమా వేసవిలో వన్ అఫ్ ది బిగ్గెస్ట్ ఎట్రాక్షన్ గా ఏప్రిల్ 11న థియేటర్లలోకి వచ్చింది.మరి ఈ సినిమా ఎలా ఉంది, ప్రేక్షకులను ఎంతవరకు ఆకట్టుకుంది అనేది ఇప్పుడు రివ్యూలో చూద్దాం.
కథ:
కృష్ణ (యాంకర్ ప్రదీప్)హైదరాబాద్‌లోని ఒక కన్స్ట్రక్షన్ కంపెనీలో సివిల్ ఇంజనీర్‌. ఆంధ్ర-తమిళనాడు సరిహద్దుల్లోని ఓ గ్రామంలో మరుగుదొడ్లు నిర్మించే కాంట్రాక్ట్.. కృష్ణ పనిచేసే కంపెనీకి దక్కుతుంది. దీంతో ఆ గ్రామానికి తన డ్రైవర్ (సత్య)తో కలిసి కృష్ణ వెళ్తాడు. అయితే ఆ ఊరి కట్టుబట్ల ప్రకారం బయట వాళ్లను లోపలికి రానివ్వరు. కానీ రోడ్లు వేసే పని కావడంతో కొన్ని నిబంధనలతో కృష్ణ వాళ్లను గ్రామంలోకి అనుమతిస్తారు.
ఇక ఆ ఊరి విషయానికొస్తే అందులో 60 మంది కుర్రవాళ్లు ఉండగా.. ఒక్కతే అమ్మాయి రాజా (దీపిక పిల్లి) ఉంటుంది. ఆమెను ఆ గ్రామానికి అదృష్ట దేవతగా భావిస్తుంటారు. ఆమె ఆ 60 మంది కుర్రాళ్లలో ఎవరో ఒకరిని పెళ్లి చేసుకోవాలని.. ఆమె పెళ్లి చేసుకున్న వ్యక్తిని ఆ ఊరి ప్రెసిడెంట్‌ను చేయాలని ముందే నిర్ణయిస్తారు. అయితే అనుకోకుండా రాజాను కృష్ణ కలవడమే కాకుండా, మొదటి కలయికలోనే ముద్దు పెడతాడు. ఆ తర్వాత ఇద్దరి మధ్య ప్రేమ చిగురిస్తుంది. ఆ తర్వాత ఏమైంది? కృష్ణ, రాజా ఒక్కటయ్యారా? వారి ప్రేమ గురించి ఊరిలో తెలిసిందా? తెలిశాక ఊరి వాళ్ళ రియాక్షన్ ఏంటి? అనే విషయాలు తెలియాలి అంటే సినిమాను బిగ్ స్క్రీన్ మీద చూడాల్సిందే.
విశ్లేషణ :
ప్రదీప్, దీపిక పిల్లి కాంబినేషన్‌లో సినిమా ప్రకటించినప్పటి నుంచి ఈ సినిమాపై మంచి అంచనాలే ఏర్పడ్డాయి. ఇప్పటికే ఢీ షోలో వీరిద్దరూ కలిసి చేసిన కామెడీ ప్రేక్షకులను ఆకట్టుకుంది. పైగా “30 రోజుల్లో ప్రేమించడం ఎలా” సినిమా తర్వాత ప్రదీప్ హీరోగా నటించడంతో, ఈ సినిమా ఎలా ఉంటుందో అని అందరూ ఆసక్తిగా ఎదురుచూశారు. ఇక, ఈ సినిమా స్టార్టింగ్ నుంచి ఫన్ మోడ్‌లోనే సాగుతుంది. తమిళనాడు సరిహద్దులోని ఒక ఆంధ్ర గ్రామంలో పుట్టిన ఏకైక అమ్మాయి రాజాను ఆ ఊరి యువకులందరూ అల్లారుముద్దుగా చూసుకుంటూ ఉంటారు. 60 మందిలో ఒకరిని ఆమె వివాహం చేసుకుంటే, ఆ ఒక్కరికి ఊరికి ప్రెసిడెంట్ పదవిని వారసత్వంగా కట్టబెట్టి, ఊరిని జాగ్రత్తగా చూసుకునేలా ఆ ఊరి పెద్ద ప్లాన్ చేస్తాడు. అయితే, అనుకోకుండా ఆ ఊరికి సివిల్ ఇంజనీర్‌గా వచ్చిన ప్రదీప్ ఆ ఊరి అమ్మాయితో ప్రేమలో పడడంతో అసలు కథ మొదలవుతుంది. దీన్ని ముందుకు ఎలా తీసుకెళ్తారని ఆసక్తిగా ఎదురుచూస్తున్న సమయంలో, ఒక ఆసక్తికరమైన ఇంటర్వెల్‌తో ఫస్ట్ హాఫ్ ముగించారు. ఫస్ట్ హాఫ్ అంతా కామెడీతో ఆకట్టుకునేలా రాసుకున్నారు. చాలా చోట్ల సత్య-ప్రదీప్ ట్రాక్‌తో పాటు సత్య, గెటప్ శ్రీను ట్రాక్‌లు బాగా పేలాయి.
అయితే, ఫస్ట్ హాఫ్ ఎంత ఆసక్తికరంగా సాగిందో, సెకండ్ హాఫ్ మాత్రం కూడా అంతే ఆసక్తికరంగా మలచడంలో దర్శక ద్వయం సఫలం అయింది . కాక పోతే ఫస్ట్ హాఫ్ కామెడీ చాలా ఆర్గానిక్‌గా వస్తే, సెకండ్ హాఫ్‌లో కామెడీ మాత్రం కాస్త ఫోర్స్డ్‌గా అనిపిస్తుంది. కొన్ని చోట్ల కామెడీ చాలా బోరింగ్‌గా అనిపిస్తుంది. ఇలాంటి కథతో గతంలో సినిమాలు రాలేదు కానీ, సిమిలర్ లైన్‌తో కొన్ని మాత్రం సినిమాలు వచ్చాయి. హీరో-హీరోయిన్‌ల పెళ్లి కావాలంటే, హీరోయిన్ చెల్లెళ్లకు లేదా హీరో చెల్లెళ్లకు పెళ్లిళ్లు చేస్తే, ఆ తర్వాత వివాహాలు జరిగేలా నిబంధనలు పెట్టుకున్న గతంలో కొన్ని సినిమాలు వచ్చాయి. ఇక్కడ అలాంటి ఒక పాయింట్‌ను ప్రధానంగా తీసుకున్నారు. అయితే, ఆ పాయింట్ బాగా కనెక్ట్ అయ్యేలా ఉంది. చివరికి క్లైమాక్స్ వరకు సత్య, గెటప్ శ్రీను , ప్రదీప్ ల కామెడీ కడుపుబ్బా నవ్వించేలా ఉంది.హీరోయిన్ పాత్రలో ఎమోషన్‌ను సరిగ్గా చూపించలేకపోయారు. ప్రీ క్లైమాక్స్‌లో వచ్చే ఎమోషనల్ సీన్స్ కూడా బలవంతంగా ఇరికించినట్లే అనిపిస్తుంది. అయితే చివరలో వచ్చే ట్విస్ట్ బాగుంటుంది.
ఎవరెలా చేశారంటే..
కృష్ణ అనే పాత్రలో ప్రదీప్ ఆకట్టుకున్నాడు. “పక్కవాడు ఎలా పోతే నాకేం” అనుకునే ఒక టిపికల్ మైండ్‌సెట్ ఉన్న కుర్రాడిగా ఇమిడిపోయాడు. రాజా అనే పాత్రలో దీపిక కూడా అలాగే సెట్ అయింది. వీరిద్దరి కాంబినేషన్ కూడా స్క్రీన్ మీద బాగుంది. ఇక సత్యతో పాటు గెటప్ శ్రీను చేసిన హంగామా అంతా ఇంతా కాదు. వీరిద్దరి ట్రాక్ ఆసక్తికరంగా సాగడం సినిమాకి బాగా ప్లస్ అయింది. మురళీధర్ గౌడ్, రోహిణి వంటి వారు తమ పాత్రల పరిధి మేరకు ఆకట్టుకున్నారు.
టెక్నికల్‌గా ఎలా ఉందంటే..
రథన్ అందించిన పాటలు ఆకట్టుకునేలా ఉన్నాయి. బ్యాక్‌గ్రౌండ్ స్కోర్ కూడా సినిమాకి తగ్గట్టుగా ఉంది. పాటలు మాత్రం అంతగా ఆకట్టుకోలేవు. లొకేషన్స్ సినిమాకి తగ్గట్టుగా ఉన్నాయి. నిర్మాణ విలువలు కూడా సినిమా స్థాయికి తగ్గట్టు బాగున్నాయి. నిడివి విషయంలో ఇంకా కేర్ తీసుకుని ఉంటే బాగుండేది. సినిమాటోగ్రఫీ సినిమాకి ప్రధానమైన అసెట్ అనే చెప్పాలి.
బలాలు
+ ప్రదీప్-దీపిక కెమిస్ట్రీ
+ కామెడీ
బలహీనతలు
– ఎమోషనల్ సీన్స్
చివరగా.. “అక్కడ అమ్మాయి ఇక్కడ అబ్బాయి” ఒక ఫుల్లీ లోడెడ్ ఫన్ ఎంటర్‌టైనర్.
రేటింగ్ 2.75
About The Author
