కుత్బుల్లాపూర్లో అక్రమాలపై ఉక్కుపాదం
-వర్షాకాల అత్యవసరాలకు ప్రత్యేక టాస్క్ఫోర్స్.. ప్రజలకు మెరుగైన సేవలే లక్ష్యం
-అక్రమ నిర్మాణాలు, రహదారి ఆక్రమణల తొలగింపునకు కఠిన చర్యలు
-ప్రతి సర్కిల్కు ప్రత్యేక యంత్రాలు, సిబ్బందితో ఎస్ఎఫ్టీ బృందాల ఏర్పాటు
-పారిశుద్ధ్యం, నిర్మాణ వ్యర్థాల తొలగింపు, మెగా శుభ్రత కార్యక్రమాలకు సహకారం
-వర్షాకాల విపత్తులకు వేగవంతమైన స్పందనకు మూడు నెలల ప్రత్యేక కార్యాచరణ
-కూలిన చెట్లు, నీటి నిల్వలు, ప్రమాదకర నిర్మాణాల తొలగింపుపై ప్రత్యేక దృష్టి
-‘జీరో ఐడిల్ టైమ్’ విధానంతో యంత్రాలు, సిబ్బంది పూర్తి స్థాయిలో వినియోగం
కుత్బుల్లాపూర్, జులై 8 ( నమస్తే భరత్ ): కుత్బుల్లాపూర్ జోన్ పరిధిలో అక్రమ నిర్మాణాల నియంత్రణ, రహదారి ఆక్రమణల తొలగింపు, పారిశుద్ధ్య వ్యవస్థను మరింత మెరుగుపరచడం, వర్షాకాల అత్యవసర పరిస్థితుల్లో ప్రజలకు వేగవంతమైన సేవలు అందించడమే ప్రధాన లక్ష్యమని జోనల్ కమిషనర్ పింకేష్ కుమార్ లలిత్ కుమార్ తెలిపారు. ఈ మేరకు కుత్బుల్లాపూర్ జోన్లో పట్టణ ప్రణాళిక నిబంధనలను కఠినంగా అమలు చేయడంతో పాటు వర్షాకాలంలో సంభవించే ప్రకృతి వైపరీత్యాలు, అత్యవసర పరిస్థితులను సమర్థంగా ఎదుర్కొనేందుకు ప్రత్యేక టాస్క్ఫోర్స్ (ఎస్ఎఫ్టీ) బృందాలను మూడు నెలల పాటు అన్ని సర్కిళ్లకు కేటాయించినట్లు వెల్లడించారు. ఇప్పటికే ప్రత్యేక యంత్రాలు, సిబ్బందితో కూడిన ఈ బృందాలు విధుల్లో చేరాయని, ఉన్నతాధికారులు జారీ చేసిన మార్గదర్శకాలను ప్రతి సర్కిల్ అధికారి తప్పనిసరిగా అమలు చేయాలని ఆదేశించారు.
ప్రతి సర్కిల్కు ప్రత్యేక బృందం
ప్రతి ఎస్ఎఫ్టీ బృందానికి ఒక ప్రోక్లైనర్, ఒక ట్రాక్టర్, ఒక గ్యాస్ కట్టర్, ఒక ఎయిర్ కంప్రెసర్ను అందుబాటులో ఉంచారు. అదనంగా ఇద్దరు డ్రైవర్లు, ఇద్దరు ఆపరేటర్లు, ఇద్దరు కార్మికులతో ప్రత్యేక బృందాలను ఏర్పాటు చేశారు. విధుల నిర్వహణలో భద్రతకు అత్యంత ప్రాధాన్యం ఇస్తూ రక్షణ బూట్లు, రేడియం జాకెట్లు, యూనిఫాంలు, భద్రతా టేపులు తదితర భద్రతా సామగ్రిని కూడా అందజేశారు.
అన్ని విభాగాలకు సేవలు
ప్రత్యేక టాస్క్ఫోర్స్ బృందాలు కేవలం టౌన్ ప్లానింగ్ పనులకే పరిమితం కాకుండా అవసరాన్ని బట్టి అన్ని విభాగాలకు సేవలందించేలా ఆదేశాలు జారీ చేశారు. టౌన్ ప్లానింగ్ విభాగంలో అక్రమ నిర్మాణాల కూల్చివేత, రహదారి ఆక్రమణల తొలగింపు, ఖాళీ స్థలాల శుభ్రపరిచే పనులను చేపట్టనున్నారు. పారిశుద్ధ్య విభాగానికి మద్దతుగా ప్రధాన ప్రాంతాల్లో పేరుకుపోయిన చెత్త తొలగింపు, భారీ నిర్మాణ వ్యర్థాల తరలింపు, మెగా పారిశుద్ధ్య కార్యక్రమాల నిర్వహణలో కూడా ఈ బృందాలు కీలక పాత్ర పోషించనున్నాయి.
వర్షాకాలానికి ప్రత్యేక కార్యాచరణ
వర్షాకాలంలో నీటి నిల్వలను తొలగించడం, రహదారులపై కూలిపోయిన చెట్లను వెంటనే తొలగించడం, ప్రమాదకరంగా మారిన నిర్మాణాలను తాత్కాలికంగా భద్రపరచడం వంటి అత్యవసర పనులను వేగంగా నిర్వహించేందుకు ప్రత్యేక కార్యాచరణ రూపొందించినట్లు అధికారులు తెలిపారు. ప్రజలకు ఎలాంటి అసౌకర్యం కలగకుండా తక్షణ స్పందనతో సేవలు అందించడంపై ప్రత్యేక దృష్టి సారించినట్లు పేర్కొన్నారు.
‘జీరో ఐడిల్ టైమ్’ అమలు
ప్రతి సర్కిల్కు చెందిన పట్టణ ప్రణాళిక ఏసీపీలు, ఫీల్డ్ సూపర్వైజర్లు సంయుక్తంగా వారాంత కార్యాచరణ ప్రణాళికను ముందుగానే సిద్ధం చేసి అమలు చేయాలని జోనల్ కమిషనర్ ఆదేశించారు. యంత్రాలు, సిబ్బంది ఎట్టి పరిస్థితుల్లోనూ ఖాళీగా ఉండకుండా ‘జీరో ఐడిల్ టైమ్’ విధానాన్ని కచ్చితంగా అమలు చేస్తూ అవసరానికి అనుగుణంగా అన్ని విభాగాల్లో సమర్థవంతంగా వినియోగించాలని స్పష్టం చేశారు. ప్రజలకు మెరుగైన మౌలిక వసతులు, పారదర్శక పాలన, వేగవంతమైన సేవలందించడంలో ప్రతి అధికారి బాధ్యతాయుతంగా పనిచేయాలని సూచించారు.
