బాచుపల్లి పరిశ్రమల్లో కార్మిక హక్కుల ఉల్లంఘనపై సీఐటీయూ ఆందోళన
-జి.ఓ. నెం.6 ప్రకారం కనీస వేతనాలు వెంటనే అమలు చేయాలని డిమాండ్
-ఈఎస్ఐ, పీఎఫ్ వంటి చట్టబద్ధ సౌకర్యాలు కల్పించడంలో యాజమాన్యాల నిర్లక్ష్యం
-కార్మిక సంఘాల నాయకులపై బెదిరింపులు ప్రజాస్వామ్యానికి విరుద్ధమని విమర్శ
-ప్రత్యేక తనిఖీలు నిర్వహించి ఉల్లంఘన సంస్థలపై కఠిన చర్యలు తీసుకోవాలని విజ్ఞప్తి
-కార్మికుల హక్కుల పరిరక్షణలో ప్రభుత్వం తక్షణ జోక్యం చేసుకోవాలని డిమాండ్
-డిమాండ్లు నెరవేరకపోతే సీఐటీయూ ఆధ్వర్యంలో భారీ ఆందోళనలకు హెచ్చరిక
బాచుపల్లి, జూలై 12 ( నమస్తే భరత్ ):
బాచుపల్లి మండలంలోని పారిశ్రామిక ప్రాంతాల్లో పనిచేస్తున్న వేలాది మంది కార్మికులకు రాష్ట్ర ప్రభుత్వం ప్రకటించిన కనీస వేతనాలు, చట్టబద్ధమైన కార్మిక హక్కులు ఇప్పటికీ అమలు కాకపోవడం ఆందోళనకరమని సీఐటీయూ జిల్లా ప్రధాన కార్యదర్శి ఎ. అశోక్ పేర్కొన్నారు. రాష్ట్ర ప్రభుత్వం జారీ చేసిన జి.ఓ. నెం.6 ప్రకారం నిర్ణయించిన కనీస వేతనాలను అన్ని పరిశ్రమలు తక్షణమే అమలు చేయాలని ఆయన డిమాండ్ చేశారు.
శనివారం విడుదల చేసిన ప్రకటనలో ఆయన మాట్లాడుతూ, అనేక పరిశ్రమల్లో కార్మికులకు నిర్ణీత కనీస వేతనాల కంటే తక్కువ జీతాలు చెల్లించడంతో పాటు, ఈఎస్ఐ, పీఎఫ్ వంటి చట్టబద్ధమైన సంక్షేమ సౌకర్యాలను కల్పించకుండా యాజమాన్యాలు కార్మిక చట్టాలను బహిరంగంగా ఉల్లంఘిస్తున్నాయని ఆరోపించారు. కార్మికులు తమ చట్టబద్ధమైన హక్కుల కోసం సంఘటితమై కనీస వేతనాల అమలు కోరిన సందర్భాల్లో కార్మిక సంఘాల నాయకులను బెదిరించడం, ఒత్తిళ్లకు గురిచేయడం ప్రజాస్వామ్య స్ఫూర్తికి విరుద్ధమని ఎ. అశోక్ విమర్శించారు. ఇటువంటి వేధింపులను యాజమాన్యాలు వెంటనే నిలిపివేయాలని హెచ్చరించారు.
బాచుపల్లి మండలంలోని అన్ని పారిశ్రామిక సంస్థల్లో పనిచేస్తున్న కార్మికులకు కనీస వేతనాలతో పాటు ఈఎస్ఐ, పీఎఫ్ తదితర చట్టబద్ధ హక్కులను తక్షణమే అమలు చేయాలని ఆయన ప్రభుత్వాన్ని కోరారు. అలాగే కార్మిక శాఖ అధికారులు ప్రత్యేక తనిఖీలు నిర్వహించి, కార్మిక చట్టాలను ఉల్లంఘిస్తున్న సంస్థలపై కఠిన చర్యలు తీసుకోవాలని విజ్ఞప్తి చేశారు.
కార్మికుల హక్కుల పరిరక్షణ విషయంలో ప్రభుత్వం నిర్లక్ష్య ధోరణి వీడి వెంటనే చర్యలు చేపట్టాలని, లేనిపక్షంలో సీఐటీయూ ఆధ్వర్యంలో బాచుపల్లి పారిశ్రామిక ప్రాంతంలో భారీ స్థాయిలో ఆందోళన కార్యక్రమాలు చేపడతామని ఎ. అశోక్ హెచ్చరించారు. ఈ సందర్భంగా కార్మికుల సంక్షేమాన్ని కాపాడే దిశగా ప్రభుత్వం, కార్మిక శాఖ తక్షణ చర్యలు తీసుకోవాలని ఆయన పునరుద్ఘాటించారు.
